Sulisussarsiorneq qanoq ingerlanneqartarpa?

Qinnuteqartumik eqqortumik atorfinitsitsinissat qulakkeerumallugu sulisussarsiornerup iluatsitsiffiulluarnissaanut immikkoortut arlallit tunngavigineqartarput. 

Sulisussarsiorneq ilisarnaatigisanik piginnaasanillu misissueqqissaarnermik aallarnertarparput. Tassanilu peqatigiilluta qinnuteqartumut eqqortumut kissaatigisanik piumasaqaatinillu arlalinnik aalajangersaasarpugut, tassunga ilanngullugit aamma qinnuteqartup ilisarnaatigisassai, qanoq misilittagaqartiginissaa, piginnaasai anguniagassallu. 

Tullinnguullugulu atorfimmut piukkunnartussarsiorneq ingerlanneqartarpoq. Allagarsiinerullu saniatigut namminerisamik CV-databasetsinni inuillu attaveqaqatigiittarfiini (Ass. LinkedIn-imi) ujarlertarpugut – attaveqarfigisarpassuagullu aqqutigalugit piukkunnarnerpaat nassaarinissaannut aamma atortarlutigit. Piukkunnartut atorfimmut qinnuteqarnissaminnut kajumilersinnissaat anguniagaavoq. 

Qinnuteqartut piukkunnarnerpaat kajumissuseqarnerpaallu saqqummiutinnginnerini qinnuteqaatit tiguneqartut tamaasa misissortarpagut qinnuteqartullu ilisarnaatissaanut piginnaasassaanullu piumasaqaatit, illit suleqatigalutit aalajangersakkagut, najoqqutaralugit sukumiisumik nalilersuiffigisarlutigit. 

Piukkunnartutut toqqarneqartut illit peqatigalutit marloriarluta oqaloqatigissavagut. Oqaloqatiginninnerillu taakku marluk akornanni piukkunnartunik misilitsitsinerit ingerlattarpagut oqaaseqaatinillu piniartarluta. Tamatumalu kingorna qinnuteqartoq pillugu sukumiisumik nalunaarusiortarpugut tunngavilersukkamik inassuteqaatitalimmik. Inassuteqaat kajumissuseqarnermut pissutsinik, aqutsinermut innersuussummik eqqumaffigisassanillu ilaatigut imaqartarpoq. 

Sulisussarsiornerlu aatsaat naammassineqassaaq piukkunnartumik eqqortumik peqatigiilluta nassaareerutta, atorfinitsitsinermilu isumaqatigiissut illuatungeriinnit atsiorneqareerpat. 

Attavigitigut

Niels Thomsen

Piginnittoq pisortaanerlu

Thomsen Consultning Cand.scient.adm. Niels Thomsenimit Ilulissani inunngorlunilu peroriartortumit pigineqarlunilu ingerlanneqarpoq.
Niels pisortatut, siulersuisunut siulittaasutut inatsisartunilu suliaqarnermi aqutsisutut qullersatut annertuumik misilittagaqarpoq. 
Tamatumalu malitsigisaanik inuiaqatigiinni kalaallini atituumik attaveqarfeqarpoq – suliffeqarfiillu namminersortut pisortaniillu pigineqartut qanoq ingerlanneqarnerat immikkuullarissumik  ilisimasaqarfigilersimallugit. 

Nielsimut aqutsilluarneq pikkorissunillu kajumissuseqartunillu sulisoqarneq pitsaasunik angusaqarnissamut aqqutissaapput, suleqatigiinneq tatigeqatigiissumillu atassuteqarneq aaqqissuussaanernut ingerlalluartunut naammassisaqarfiulluartunullu tunngaviullutik. Tamannarpiarlu pissutigalugu Nielsip sulisussarsiorneq aamma piginnaanilinnik aqutsisunillu ineriartortitsineq ukkataralugit suliffeqarfiutini ingerlappaa. 

Nielsip sunngiffimmini isikkamik arsarneq aallutarilluarpaa. Inuusunnerugallarami arsartartuuvoq – Nunattalu nunanut allanut unammisartuini arlaleriarluni unammeqataasarsimalluni. Kingusinnerusukkullu Ilulissani inuusuttunut piginnaanilinnut isikkamik arsarnermi sungiusaasuuvoq, arsartartunillu kajumilersitsiniartarnini ineriartortitsisarninilu suliffeqarfinni atassuteqarfigisamini periaaserisartakkamisulli ingerlattarlugit. Aallussilluarnikkut, pimoorussilluarnikkut suliatigullu ilisimasaqarluarnikkut.
Mobil: +299 586 636
E-mail: niels@thomsen.gl